Gen 33 | ZomZIV | STEP | Jacob a khuadak le Esau le a mi za lite hong pai mu hi; tua ciangin Leah, Rachel le a nasem numeite kiangah a tate khen hi.

Genesis 33

Jacob le Esau Kituak

1 Jacob a khuadak le Esau le a mi za lite hong pai mu hi; tua ciangin Leah, Rachel le a nasem numeite kiangah a tate khen hi. 2 Anasem numeite le a tate uh masasak a, Leah le a tate zomsakin Rachel le Joseph nunungsak hi. 3 Amah masa in a sanggampa lam a manawh kawmin sagih vei leilamah a kun hi. ^a

4 Ahi hangin Jacob tawh kituah dingin Esau tai-a, amah a kawi hi; amah ngawngkawi-in a nam hi. Amaute kap uh hi. 5 Tua ciagnin Esau khuadak a numeite le naupangte mu hi. Amah in, “Hih nong tonpihte kua hiam?” ci-in dong hi. ^b

Jacob in, “Pasian in a hehpihna tawh na nasempa a piak tate ahi hi,” ci-in dawng hi. ^c

6 Tua ciangin nasem numeite le a tate uh pai-in a kun uh hi. 7 Tua zomin Leah le a tate pai-in a kun uh hi. A nunung penin Joseph le Rachel pai-in a kun uh hi.

8 Esau in, “Ka kituahpih uh a kihawl teng bang na cihna hiam?” ci-in a dong hi.

Amah in, “Nangmah ka topa maipha ka zonna ahi hi,” ci hi. ^d

9 Ahi hangin Esau in, “Sanggam aw, ken tampi ka nei khin hi. Nang aate nangmah in kem in,” ci hi.

10 Jacob in, “Hi kei, nang muhna-ah maipha ka ngah leh nong hehpihna-in nang tang in. Ahang in, tu-a na maipha ngahin nong sana, na mai ka muh pen Pasian mai mu mah ka bang hi. 11 Pasian in kei hong hehpih a, ka kisapna khempeuh ka nei hi. Kong puaksa letsongte hong sang hoh in,” ci hi. Jacob in a cih tentan manin Esau in sang hi.

12 Tua ciangin Esau in, “I pai nadingah pai ni, i tonkhawm ding hi,” ci hi.

13 Ahi hangin Jacob in, “Naupangte a moi luat lam ka topa in na thei hi. Ka tuunote le ka bawngpi nongek nei laite kong kem ding hi. Ni khat kinawh hawl lua leh ganhing khempeuh si ding hi. 14 Tua ahi ciangin ka topa a nasempa mai-ah na pai in; Seir a ka topa kiang kong tun mateng naupangte le gan masuanin damdamin a nung uh kong zui ding hi,” a ci hi.

15 Esau in, “Tua ahileh ka mite honkhat kong nusiat ding hi,” ci hi.

Jacob in, “Bang hanga tua cih ding na hiam?” ci-in donga, ka topa mai-ah maipha hong ngahsak hoh in,” ci hi. ^e

16 Tua ahi ciangin tua ni-in Seir a ciah kik dingin Esau dingkhia hi. 17 Ahi zongin Succoth ah Jacob pai-a, tua lai-ah ama mun ding bawlin a gante hampheng ding a lam hi. Tua ahi manin tua mun Succoth ^{▼▼33.17 Succoth pen liah cihna} kici hi.

18 Paddan Aram ^{▼▼33.18 Tua pen Mesopotamia Sak nitumna} pan Jacob a paikhiat khitin Canaan a Shechem khuapi ^{▼▼33.18 Ahikeh Shalem ah tunga} dong bittakin tunga, khuapi huam sungah giahphual sat hi. 19 Amah in Shechem’ pa Hamor’ tapa tung pana nguntang ^{▼▼33.19 Hebrew in kesitah za khat, kesitah khat pen sumin a gihna man kithei lo hi} zakhata a leisa leitang munah a puanbuk lam hi. 20 Tua lai-ah biakna-tau khat dawha, El Elohe Israel ^{▼▼33.20 El Elohe Israel pen Pasian, Israel-te Pasian cihna hi thei hi. Ahikeh a thahat Israel-te Pasian} min a phuak hi.